ՏԻԳՐԱՆ ՀԱՄԱՍՅԱՆԻ ԲԱՐԵԳՈՐԾԱԿԱՆ ՄԵՆԱՀԱՄԵՐԳԸ ԳՅՈՒՄՐԻՈՒՄ

0-0-0-000
 Գյումրիի Վարդան Աճեմյանի անվան պետական դրամատիկական թատրոնում տեղի ունեցավ հայկական ջազում նորը թելադրող գյումրեցի դաշնակահար Տիգրան Համասյանի մենահամերգը:

 Այս անգամ ևս ծննդավայրում համերգը բարեգործական էր, ինչպես մի քանի տարի առաջ, երբ Համասյանը նվագեց Գյումրու տնակային «Ֆանտաններ» կոչվող թաղամասում․ հավաքված գումարը տրամադրվեց բարեգործությանը: Այս անգամ էլ համերգի ողջ հասույթը փոխանցվելու է «Գյումրու դրամատիկական թատրոնին աջակցման հիմնադրամ»-ին, որն էլ լուծելու է բնակարանային խնդիր ունեցող դերասանների բնակարանային հարցը:

 «Պետք է մի համեմատություն անեմ, երբ տասը տարի առաջ Գյումրիում Տիգրան Համասյանի համերգն էր, մենք շատ դժվարությամբ էինք կարողանում տոմսեր վաճառել։ Տասը տարի հետո մենք նույն ստեղծագործողին հանդիպում ենք Գյումրիում և տեսնում ենք, որ մարդիկ ուղղակի չեն կարողանում տոմսեր գտնել։ Սա խոսում է այն մասին, որ սերունդ է փոխվել, որ հանդիսատեսի պահանջներն են փոխվել, որ բարձրակարգ միջոցառումները, բարձրակարգ համերգային ծրագրային ներկայացումները եկել են գրավելու իրենց տեղը»,- ասաց Գյումրիի դրամատիկական թատրոնի տնօրեն Տիգրան Վիրաբյանը։

 Տիգրան Համասյանը Գյումրիում հանդես եկավ նաև նոր ստեղծագործություններով։ Փետրվարին լույս է տեսնելու նոր ձայնասկավառակ, որը կոչվելու է «For Gyumri»՝ «Գյումրու համար»։ Համասյանը կատարեց երկու ստեղծագործություն այդ ձայնասկավառակից՝ «Արագած» և «Ինքնանկար»։

 Դաշնակահարի «Լեննական» ստեղծագործությանը միացան Գյումրու Հ. Օյունջյանի արվեստի և թիվ 7 երաժշտական դպրոցների սաները: Համերգի ընթացքում հանդիսատեսն ու դաշնակահար ջազմենը կարծես զրուցում էին մեկ այլ մակարդակում, որտեղ տիրում էր հնչյունի զորությունը:

Անահիտ Հարությունյան

23376503 1530847836969079 3052636527453416765 n

23380270 1456275544426740 890824595475765138 n

23517794 1530847846969078 5633254551725862980 n

23517787 1456285631092398 8268418314448863199 n