ՋՈՐՋ ՓԵՀԼԻՎԱՆՅԱՆԻ «ՄԵԾ ՀԱՄԵՐԳԸ» ՀԱՅԱՍՏԱՆՈՒՄ
«Մեծ Եղեռնի 50-րդ տարելիցին, մայրս՝ Արփինե Փեհլիվանյանը, այս բեմի վրա երգել է, իսկ այսօր իր զավակներն են կանգնելու նրա փոխարեն»,- լրագրողների հետ ճեպազրույցի ընթացքում ասաց Ջորջ Փեհլիվանյանը:
Ապրիլի 18-ին աշխարհահռչակ դիրիժոր, ջութակահար Ջորջ Փեհլիվանյանը «Մեծ համերգով» հանդես կգա Սպենդիարյանի անվան օպերայի և բալետի ազգային ակադեմիական թատրոնում: Համերգը նվիրված է Հայոց ցեղասպանության 100-րդ տարելիցին, որին կմասնակցեն Երևանի անսամբլային նվագախումբը, «Միրզոյան կվարտետը», ԱՅԲ դպրոցի և ֆրանսիական միջազգային դպրոցի մանկական երգչախմբերը: Ելույթ կունենա դրիրժորի քույրը՝ մենակատար Էլիզավետ Փեհլիվանյանը (սոպրանո):
«Այս նախագիծը յուրահատուկ է, նման չէ իմ ղեկավարած մյուս համերգներին, որտեղ հանդես եմ գալիս մեծ նվագախմբով: Ցանկացա Եղեռնի 100-ամյակին նվիրված միջոցառումը լինի ավելի ազգային, ուստի հանդես եմ գալիս երիտասարդների հետ, ովքեր մեր ազգի հույսն են ու ապագան»,- նշեց Փեհլիվանյանը:
Համերգի ընթացքում Փեհլիվանյանը Միրզոյան քառյակի հետ ջութակ կնվագի, ինչը վերջին անգամ Հայաստանում արել է 1994-95 թվականներին:
Ծրագրում կհնչեն Կոմիտասի, Ռավելի, Հարությունյանի, Այվազյանի, Շարաֆյանի ստեղծագործությունները:
Ամալյա Մարգարյան
- Created on .
- Hits: 2507