«ՏԱՆ ԴՈՒՌԸ» ԿԱՄ ԱՆԿԱԽՈՒԹՅԱՆ ՊՈԵԶԻԱ
Պատգամների դռան տունն ենք մոռացել,
ուր հավաքվում էինք երեկոները, նկարում արև
ու լույսի մասին երգում մի հին մեղեդի․․․
Լույս է տեսել բանաստեղծ, լրագրող Հուսիկ Արայի «Տան դուռը» ժողովածուն։ Գրքում տեղ են գտել հեղինակի վերջին չորս տարիների ստեղծագործությունները՝ բանաստեղծություններ, պոեմներ, էսսեներ, անկախության պոեզիայից մինչև սիրային բանաստեղծություններ ու սաղմոսներ։
«Մենք պատերազմի և հեղափոխության արանքում կորած սերունդ ենք»,- «Դալան» ցուցասրահում կայացած շնորհանդեսի ժամանակ ասաց հեղինակն ու ավելացրեց,- ես ոչ միայն անկախության շրջանում ստեղծագործող մարդ եմ, այլ անկախությունը ներկայացնող հեղինակ»։
«Տան դուռը» գրքում ընդգրկված է նաև «Ազատության հրապարակ» շարքը համանուն գրքից։ «Ազատության հրապարակը» հեղինակի նախորդ գիրքն է։ Հուսիկ Արան գիրքը տպագրել է Արցախյան շարժման 25-ամյակի առիթով։
«Անկախությունը միակ բանն է, որի համար պատրաստ եմ արյունս տալ։ Այն վեր է, բարձր է ամեն ինչից»,- նշում է բանաստեղծը։
Հանդիպման վերջում Հուսիկ Արան շնորհակալություն հայտնեց այն լուսավոր աղջկան, ով իր ներշնչանքի աղբյուրն է։ Հարցին, թե ով է նա, պատասխանեց՝ ինքս ինձ էլ չեմ խոստովանում։
Աննա Կարապետյան
- Created on .
- Hits: 3706