ՀԱՅԿԱԿԱՆ ԳՈՐԳԵՐԻ ՔԱՐՈԶՉՈՒԹՅՈՒՆ ՆՈՐՈՎԻ
Դարեր շարունակ հայկական գորգերն օգտագործվել են տան կահավորանքի մեջ, դրանցից ամենագեղեցիկները, նույնիսկ, կախվել են պատերից՝ որպես արվեստի գործեր: Այսօր արդեն այդ յուրօրինակ «կտավները» կարելի է կրել հագուստի տեսքով: Տերյան մշակութային կենտրոնը հանրությանը կներկայացնի իր նոր նախաձեռնությունը՝ հագուստ հայակական գորգերի թանգարանային նմուշների նախշազարդումներով:
Կենտրոնի տնօրեն, դիզայներ Լիլիթ Մելիքյանը լրագրողների հետ հանդիպման ժամանակ նշեց, որ «Անցյալի ապագա» խորագիրը կրող այս հավաքածուն գորգերի քարոզչության նոր եղանակ է, փորձ՝ հագուստի միջոցով դրանք առավելի կիրառելի և ճանաչելի դարձնելու: Հենց այդ է պատճառը, որ հագուստի գները, ըստ դիզայների, բավականին մատչելի են և տատանվում են 5.000-50.000-ի սահմաններում:
Հավաքածուն հիմնականում նախատեսված է երիտասարդների համար, և դրա ստեղծման ժամանակ կենտրոնը հաշվի է առել նաև վերջիններիս նախասիրությունները: «Տարբեր համալսարաններից հրավիրել ենք ուսանողների, խնդրել՝ հայտնել իրենց տեսակետը հավաքածուի վերաբերյալ»,- նշում է տնօրենը:
Հագուստը մեծամասմաբ կանացի է, սակայն տղամարդիկ ևս իրենց հետաքրքրող որոշ էլեմենտներ կգտնեն: Հետագայում հնարավոր է նույնիսկ, որ ստեղծվի առանձին հավաքածու՝ նախատեսված տղամարդկանց համար: Կենտրոնի դիզայները նշեց, որ գաղափարի զարգացմանն առավել նպաստել է իր այցը Հնդկաստան, որտեղի կտորներն էլ հենց օգտագործվել են հավաքածուի աշխատանքների մեջ:
Կենտրոնն առավելապես օգտագործել է Սյունիքի և Արցախի տարբեր շրջանների գորգերն ու դրանց առանձին նախշազարդումները: Թե հետագայում գաղափարն ինչ զարգացում կունենա, կախված է միայն հանրության արձագանքից:
Հավաքածուն կցուցադրվի վաղը՝ փետրվարի 19-ին ժամը 19:00-ին՝ «Մեգերյան կարպետ» գորգերի գործարանում:
Լառա Հակոբյան
- Created on .
- Hits: 3087