«ՆՈՐ ԿԱՄԵՐԱՏԱՆ» ԿՈՄԻՏԱՍԻ ԹԱՆԳԱՐԱՆ-ԻՆՍՏԻՏՈՒՏԻ ԲԵՄՈՒՄ
Այսօր Կոմիտասի թանգարան-ինստիտուտում «Նոր կամերատա» լարային քառյակը կատարեց կոմպոզիտորներ Արամ Խաչատրյանի, Ղազարոս Սարյանի և Հարո Ստեփանյանի լարային կվարտետները։
«Հարո Ստեփանյանն այդքան հայտնի չէ այստեղ: Բարձր կարգի պրոֆեսիոնալ է։ Նրա գործերը տեխնիկապես դժվար են, երևի հենց դա է պատճառը, որ նա մի տեսակ մոռացության է մատնվել։ Ես համոզված եմ, որ նա վերածնունդ է ապրելու, և մենք կանգնած ենք այդ վերածննդի սկզբում»,- Cultural.am-ի հետ զրույցում ասաց լարային քառյակի անդամ, ալտահար Գոռ Հովհաննիսյանը
Խաչատրյանի և Սարյանի ստեղծագործությունները բազմիցս ներկայացվել են հայ երաժշտասերներին։ Ալտահարի խոսքով՝ կան էտալոնային կատարումներ, որոնց գերազանցել չեն էլ հավակնում, ներկայանում են յուրովի։
«Նոր կամերատա» կամերային երաժշտության անսամբլը կազմվել է Հայաստանի ազգային ֆիլհարմոնիկ նվագախմբի ներկայացուցիչներից: Անսամբլը պարբերաբար ելույթներ է ունենում Հայաստանում, մասնավորապես Երևանում։ Առիթ են ունեցել հանդես գալ նաև Հոլանդիայում։
Ներկայացնում են հայ և օտարազգի ինչպես դասական, այնպես էլ ժամանակակից կոմպոզիտորների ստեղծագործություններ։ Ժամանակակիցներից ներկայացրել են հունգարացի Կրիշտինա Մեգյերի, հոլանդացիներ Լուի Անդրիսենի և Ռոլֆ Ստրավերի գործերը, այդ թվում՝ պրեմիերաներ։
«Նոր կամերատա» լարային քառյակի հաջորդ համերգը նախատեսված է նոյեմբերին։ Այն նվիրվելու է հայ-հոլանդական մշակութային բարեկամությանը։ Ծրագրում ընդգրկված է նաև Ռոլֆ Ստրավերի Ալտի սոնատը։
Աննա Կարապետյան
- Created on .
- Hits: 3078