«ՆՈՐ ՏԱՂԱՆԴՆԵՐ»․ ՎԵՐԱԴԱՐՁ ԴԵՊԻ ԲՆՈՒԹՅՈՒՆ
Հոկտեմբերի 21-ին Նորարար փորձառական արվեստի կենտրոնում (ՆՓԱԿ) բացվեց «Նոր տաղանդներ» 4-րդ նախագծի ցուցահանդեսը։ Ցուցահանդեսի համադրող Արփա Հակոբյանի խոսքով՝ նախագիծը նորը փնտրելու նպատակ ունի։
«Սա հարթակ է սկսնակ արվեստագետների համար, որտեղ նրանք առիթ են ստանում փորձ ձեռք բերել և հանդիպել դիտողին: Սա առիթ է լինել ստեղծարար»,- նշում է Հակոբյանը։
«Նոր տաղանդներ» 4-րդ նախագծին մասնակցում են երիտասարդ արվեստագետներ Ռայա Բաբայանը, Ավետ Բազե Ավետիսյանը, Ստեֆանի Ասատրյանը, Իննա Կոլուպաևան, Անժելիկա Մորոզովան և Արևիկ Առաքելյանը։
Քար, ծառեր, ջուր ու գույն, և զուգահեռ տարվող մարդկային զգացողություններ․ երիտասարդ արվեստագետները վերադառնում են բնությանը։
ՆՓԱԿ-ի ցուցասրահներից մեկը վերածվել է անտառի։ Ծառի ճյուղեր և բնության ձայներ․ Անժելիկա Մորոզովայի աշխատանքն է։
«Անտառի պատկերը, խոնավության, անձրևի հոտն ու մառախուղի էֆֆեկտը նոստալգիա են առաջացնում, ներկայի, անցյալի և ապագայի անորոշ վիճակ։ Այնպիսի անհասկանալի զգացողություն է, որ չգիտես՝ ինչ է եղել քո անցյալում, ինչ կա ներկայում ու ինչ սպասել ապագայից»,- Cultural.am-ի հետ զրույցում նշեց Անժելիկան։
Այստեղ ցուցադրվելու առիթներ վերջին տասը տարիներին շատ են եղել։ 2015թ․-ին ՆՓԱԿ-ում հանդես է եկել «Դարվինը եղել է այստեղ» խորագրով անհատական ցուցահանդեսով, ներկայացրել գեղանկարներ, ինստալյացիաներ և վիդեո արտ։ Անտուն կենդանիներին նվիրված ցուցահանդեսի ժամանակ «Դինգո» թիմի նախաձեռնությամբ կայացել է նաև սննդահավաք/դրամահավաք և որդեգրման ձագուկների ցուցադրություն:
«Դինգոյի» ձագուկներից մեկն այժմ Անժելիկայինն է։ Մեկ տարի է, ինչ որդեգրել է նրան։ Ասում է՝ շատ պատասխանատու աշխատանք է։
Cultural.am-ը հետաքրքվեց՝ ինչպես ստացվեց, որ բնասեր Անժելիկան կտրեց ծառերը հանուն ինստալյացիայի։
«Չեմ կտրել ծառերը, վերցրել եմ կոտրված չոր ճյուղեր, որոնք գցված էին այգում։ Եթե չգտնեի դրանք, չէի մասնակցի այս ցուցահանդեսին»,- ասաց նա։
Աննա Կարապետյան
- Created on .
- Hits: 3379