ՆԿԱՐԻ ՈՒ ՔԱՆԴԱԿԻ ՍԻՄՖՈՆԻԱ
Գյումրու Ս. Մերկուրովի անվան թանգարանում անհատական ցուցահանդեսով է ներկայացել գյումրեցի ճարտարապետ, քանդակագործ, նկարիչ Ալբերտ Մխիթարյանը: Նա շուրջ 20 տարի բնակվում է Ֆրանսիայում: Հայրենի քաղաքում առաջին ցուցահանդեսն էր, բայց հեղինակը իր աշխատանքները արվեստասերների դատին է հանձնել 2005 թվականից:
Ցուցահանդեսը պատառիկներ էր տարբեր գործերից՝ քանդակներ, նկարներ, որոնց թեման ու մոտեցումը բազմազան էր ու ինչպես հեղինակը բնորոշեց` գույների ներդաշնակության մթնոլորտում:
Հավաքածուի մեջ մեծ թիվ են կազմում ծաղրածուների քանդակները: Ալբերտ Մխիթարյանի կարծիքով ծաղրածուները երկու բնույթ ունեն ու պետք է բավական հմուտ լինել ծաղրածուի ներքին աշխարհը բացահայտելու համար:
«Ալբերտ Մխիթարյանին ճանաչում էի որպես ճարտարապետ ու հիմա էլ ճարտարապետության ու քանդակի շատ հետաքրքիր զուգորդում է եղել: Հետաքրքիր է նաև քանդակների գունավորումը. մի պահ կարծես շփոթում ես բրոնզ է, թե՞ ոչ: Այս տարիները զուր չեն անցել նկարիչ - ճարտարապետի համար. դժվար է աշխատել օտար ափերում և նման հարուստ «ավարով» ներկայանալ մեզ»,- իր տպավորություններով կիսվեց քանդակագործ Արտուշ Պապոյանը:
Ալբերտ Մխիթարյանն էլ պարզաբանեց, թե ինչ գաղտնիք ու հմտություններ են թաքնված գունավորված քանդակների մեջ. «Աշխատանքներիս մեջ գերակշռում են կանաչով գունավորված քանդակները: Համաշխարհային քանդակագործության մեջ էլ քիչ է փիրուզային կանաչ գույնը: Եթե մի գույն ստանալու համար մի քանի օր է պահանջվում, կանաչը՝ շաբաթների արդյունք է: Ի վերջո, դա ներկ չէ, այլ թթուներով բրոնզը հասցնում ես այդ գույնի»:
Աբստրակտ նկարներում ևս շարունակվում էր քանդակների թեման, նկարն ու քանդակը լրացնում էին իրար: Ստեղծվել էր աբստրակտ իրականություն, որտեղ կարելի էր թափառել՝ գտնելով գույների ներդաշնակության սեփական ընկալելի հարթակը:
«Եթե ուղղակի գույներ լինեն, դիտորդը կանցնի, կգնա: Բայց եթե կանգնեց, կտավը հայացքը բռնեց, ուրեմն նրա մեջ արվեստ կա, որն ընդհանրացնում է ամեն ինչը: Ասօրվա կյանքն է պահանջում աբստրակտը ու քայլել կյանքին համահունչ: Նկարչությունը շատ փոփոխական է, միանգամից ժամանակի պահանջը արտացոլում է իր մեջ, մի քանի տասնյակ -իզմ-եր է փոխել միայն 20-րդ դարում, նույնը չենք կարող ասել քանդակագործության մասին: Բայց ես փորձում եմ նոր շունչ տալ քանդակներիս, ընդհանրացված ֆորմաներով եմ աշխատում, այսինքն՝ տվյալ կերպարի մեջ մեկ այլ հատկություն, շարժում, էներգիա եմ հաղորդում, որը փնտրում է դիտողը»,-իր աշխատանքնները այսպես մեկնաբանեց ցուցահանդեսի հեղինակ Ալբերտ Մխիթարյանը:
Ցուցահանդեսը կգործի մինչև հուլիսի 12-ը:
Անահիտ Հարությունյան
Անահիտ Հարությունյան
- Created on .
- Hits: 2613