ՃՇՄԱՐՏԱԽՈՍ ԵՐԳՉԻ ՀՅՈՒՐԱԽԱՂԵՐԸ ԵՎՐՈՊԱՅՈՒՄ ԵՎ ՀԱՅԱՍՏԱՆՈՒՄ
Ամերիկաբնակ երգիչ-երգահան, հեղինակային երգիչ Արմեն Մովսիսյանը համերգներով հանդես գալով Եվրոպայում, օրերս համերգ-հանդիպումներ է կազմակերպել Հայաստանում ու Լեռնային Ղարաբաղում:
Ծննդավայրում՝ Գյումրիում, հանդիպելով իր երգի սիրահարների հետ` Արմեն Մովսիսյանը պատմել է, թե ինչը ստիպեց նրան հեռանալ հայրենիքից. «Զգում ես, որ ազատ արվեստագետի համար օդը քիչ է: Ամերիկան հարևանի տունն է, բայց հարևանի տան մեջ դու ազատ ես: Այնտեղ կա անձնական տարածություն. Հայաստանում այդ տարածությունը փոքրացել է: Սիրում եմ իմ երկիրը, և հայրենիքից հեռու լինելը ինձ հանգստություն չի բերել»:
Հանդիպման ընթացքում խոսքուզրույցը ընդհատվում էր հայտնի երգերով, հեղինակը պատմում էր, թե ինչպես են ծնվել այդ ստեղծագործությունները: Նա նաև նշեց, որ շատերի կարծիքով իր երգերը քաղաքական ենթատեքստ ունեն, ինչը մի փոքր սխալ նկարագիր է: Նա իր երգերով արտահայտում է այն, ինչ կատարվում է երկրում, իսկ քաղաքականություն մտնել ու քաղաքական ենթատեքստ տալու նպատակ երբևէ չի հետապնդել:
«Թիթեռ, սեր, ծաղիկ. դրանց մասին երգող շատ կա, բայց երգել նրա մասին, ինչ ազնիվ է, դա հեղինակային երգի առաքելությունն է:
Հին ժամանակներում թագավորները ունեցել են ծաղրածուներ, և միայն նրանք են եղել ճշմարտության բարձրաձայնողները: Ես կարծում եմ, որ մենք էլ մեր ժամանակի ճշմարտախոսներն ենք»,-նշեց երգահան Արմեն Մարտիրոսյանը:
Ճշմարտախոս երգերի արվեստը Արմեն Մարտիրոսյանը տարածում է օվկիանոսից այն կողմ: Նա դպրոց է հիմնել ԱՄՆ-ում ու կիթառ է սովորեցնում հայ երեխաներին:
«Տարեվերջյան համերգներ ենք կազմակերպում, որի հասույթը ուղարկում ենք Գյումրու կարիքավոր ընտանիքներին, քառօրյա պատերազմից հետո ստեղծեցինք «Հայրենիքիս» խումբ և օգնում ենք զինվորների ընտանիքներին:
Այս երեխաները վաղը կդառնան Ամերիկայի քաղաքացիներ, բայց իրենց մեջ կունենան ազգային պատկանելիության զգացում»,- ասում է Արմեն Մովսիսյանն ու կատարում սիրելի «Վեր, կաց, եղբայր իմ..» երգը:
Այս երեխաները վաղը կդառնան Ամերիկայի քաղաքացիներ, բայց իրենց մեջ կունենան ազգային պատկանելիության զգացում»,- ասում է Արմեն Մովսիսյանն ու կատարում սիրելի «Վեր, կաց, եղբայր իմ..» երգը:
Նա ծրագրում է հաջորդ անգամ գալ Հայաստան իր աշակերտների հետ, որպեսզի վերջիններս գոնե մեկ անգամ լինեն իրենց հայրենիքում:
Անահիտ Հարությունյան
Անահիտ Հարությունյան
- Created on .
- Hits: 2659