Ավարտին է մոտենում «Gyumri Art Week»-ը

Օգոստոսի 8-ից 17-ը Գյումրիում ընթանում է ժամանակակից արվեստի միջազգային փառատոնը՝ «Gyumri Art Week»-ը: Այս տարի փառատոնը կենտրոնանում է էկոլոգիայի և շրջակա միջավայրի թեմաների շուրջ՝ մշակութային ժառանգություն, արվեստի համագործակցություն և ժամանակակից ստեղծագործական միտք: Բացի այդ, փառատոնը նվիրված է հայ խոշորագույն արվեստագետ, ժամանակակից արվեստի առաջամարտիկ, ժամանակակից արվեստի նորարար Մարկոս Գրիգորյանի (1925–2007) ծննդյան 100-ամյակին։

«Gyumri Art Week»-ը նպատակ ունի ժամանակակից արվեստի և տարբեր գիտական ոլորտների միջև համագործակցության միջոցով հող նախապատրաստել արվեստագիտական հետազոտությունների համար, խթանել դրանց տարածումը, ավելացնել հասարակական գործընթացների շուրջ հետաքրքրությունն ու քննարկումները դրանց մասին։ Այս տարի փառատոնի համադրողներն են Սարգիս Հովհաննիսյանը, Վիկտորյա Իլյուշկինան, Գագիկ Ղազարէն, Գոռ Մարգարյանը: Փառատոնի կազմակերպիչ կառույցների շարքում են Գյումրու ժամանակակից արվեստի շաբաթը (GCAW), Հայաստանի գեղարվեստի ակադեմիայի Գյումրու մասնաճյուղը, Ե. Չարենցի անվան գրականության և արվեստի թանգարանը, Մարիամ և Երանուհի Ասլամազյան քույրերի պատկերասրահը, Գյումրու Տեխնոլոգիական կենտրոնը, Սերգեյ Մերկուրովի թանգարանը, «Բեռլին Արտ» հյուրանոցը և այլ կազմակերպություններ։

«Gyumri Art Week 2025» փառատոնի հանդիսավոր  բացման արարողությունը կայացավ օգոստոսի 8-ին «Ձեռնարկությունների ինկուբատոր» հիﬓադրաﬕ (Enterprise Incubator Foundation (EIF)) Գյումրու տեխնոլոգիական կենտրոնում (ԳՏԿ):

«Փառատոնն ամեն տարի սկսում է մեծանալ իր գործընկերների թվով նաև: Մեծ հետաքրքրություն է բերում թե՛ հայ, թե՛ միջազգային արվեստագետների մասնակցությամբ: Ամեն տարի փառատոնն ունի իր կոնցեպտը, այս տարի էկոլոգիան և շրջակա միջավայրն է: Դեռ նախորդ տարվանից մտածում էինք արդեն այս կոնցեպտի շուրջ, որը պետք է նվիրված լիներ նաև մեր խոշոր արվեստագետին` Մարկոս Գրիգորյանին: Նաև բուն հայեցակարգի գաղափարական հենքը Գրիգորյանի արվեստն է, որը հեռու չէ շրջակա միջավայրից և էկոլոգիայից: Գյումրու արվեստի փառատոնը քայլում է և երկխոսում է միջազգային հարթակների հետ: Այդպիսի մի կարևոր համագործակցություն է Քիլի Գեղարվեստի ակադեմիայի հետ համագործակցությունը: Փառատոնը նաև 40-ից ավել մասնակիցների թույլ է տալիս ինքնարտահայտվել և նաև կլինեն վարպետության դասեր Հայաստանի գեղարվեստի ակադեմիայի Գյումրու մասնաճյուղում»,- ասում է փառատոնի գեղարվեստական ղեկավար, համադրող Սարգիս Հովհաննիսյանը:

Հենց Գրիգորյանին նվիրված «Արևելքի և Արևմուտքի միջև՝ Մարկոս Գրիգորյան և Համլետ Հովսեփյան» ցուցահանդեսն էլ ուսումնասիրում է երկու նշանավոր հայ արվեստագետների՝ Մարկոս Գրիգորյանի և Համլետ Հովսեփյանի ստեղծագործական ուղիները և երկխոսությունը, որոնք անդրադարձել են մշակութային ինքնության, ավանդույթի և ժամանակակիցության հատման կետերին։ Ցուցահանդեսը առանձնացնում է, թե ինչպես է յուրաքանչյուր արվեստագետ համադրել արևելյան խորհրդանիշներ, մոտիվներ և փիլիսոփայություն արևմտյան մոդեռնիստական տեխնիկայի հետ՝ ընդգծելով ինքնության և արվեստի լեզվի հոսունությունը գլոբալիզացված աշխարհում։

Գրիգորյանի և Հովսեփյանի գործերը հրավիրում են դիտորդին խորհելու հիշողության, արտագաղթի, մշակութային գոյատևման և վերածննդի թեմաների շուրջ՝ դրանք հասկանալի և համաշխարհային պատմություններ են։ Փառատոնի շրջանակում ԳՏԿ-ում էլ ցուցադրվում են մեդիա ոլորտում ստեղծագործող հայ և միջազգային 20-ից ավելի արվեստագետների աշխատանքներ։ Կոնցեպտուալ առումով նոր և բացառիկ ցուցադրությունը ԳՏԿ-ում բաց կլինի մինչև օգոստոսի 17-ը: «Ժառանգություն և Նորարարություն» ցուցահանդեսը խմբային հարթակ է, որն ուսումնասիրում է այն դինամիկ լարումներն ու երկխոսությունները, որոնք ձևավորվում են ժառանգված անցյալի և ի հայտ եկող ապագայի միջև։ Տարբեր փորձառությամբ արվեստագետներ միավորվում են՝ խորհելու, թե ինչպես է մշակութային ժառանգությունը ազդում մեր ստեղծագործական լեզվի, ինքնության և տեխնոլոգիական առաջընթացի վրա ներկայում։

Ինչպես հայտնում են թանգարանից, ցուցահանդեսը բաց հարթակ է՝ շարունակականության, խզման և վերաձևման շուրջ խորհելու համար։ Այստեղ հին իմաստությունը հանդիպում է ապագայամետ մտածողությանը։ Մասնակիցներն են՝ Միսակ Մաղաքյանը, Մարիամ Արամին, Էդգար Ամրոյանը, Գագիկ Ղազարէն, Լևոն Ֆլջյանը: Ցուցադրությունը իրականացնվում է Եղիշե Չարենցի անվան գրականության և արվեստի թանգարանի, Մարիամ և Երանուհի Ասլամազյան քույրերի պատկերասրահի եվ Համլետ Հովսեփյան հիմնադրամի համագործակցությամբ:

Ալմաստ Մուրադյան