Հայաստանի ազգային օպերայի և բալետի թատրոնը մեկնարկեց նոր թատերաշջանը

Հայաստանի մշակութային կյանքի առանցքային կենտրոններից մեկը՝ Հայաստանի ազգային օպերայի և բալետի թատրոնը, որը միավորում է ազգային ու համաշխարհային մշակութային գոհարները, ամփոփում է 2024–2025 խաղաշրջանը: Անցնող խաղաշրջանը լի էր հայ և համաշխարհային դասականների ներկայացումներով, մանկական ծրագրերով և միջազգային համագործակցություններով: 2024–2025 թթ. ընթացքում թատրոնը ներկայացրեց Վերդիի, Պուչինիի, Չայկովսկու, Բիզեի և այլ դասականների հայտնի գործեր։ 2024 թվականի հոկտեմբերի 8-ին մեծ հնչեղությամբ ազդարարվեց լեգենդար Պլասիդո Դոմինգոյի վերադարձը Երևան: Աշխարհահռչակ տենորը հանդես եկավ հայ սոպրանո Ջուլիանա Գրիգորյանի հետ համերգային ծրագրում։ Հոկտեմբերի 25-ին նշվեց Օպերայի միջազգային օրը՝ մեծ գալա համերգով, որում ընդգրկված էին ինչպես հայ, այնպես էլ օտարերկրացի մենակատարներ: 2025 թվականի փետրվարի 11-ին էլ թատրոնի բեմում մեկնարկեց Հայաստանի Պարի պետական անսամբլի 67-րդ համերգային սեզոնը։ Թատրոնը համագործակցում է օպերային և բալետային արվեստի միջազգային գործիչների հետ, ինչը հնարավորություն է տալիս Երևանի բեմը դարձնել տարածաշրջանային մշակութային կենտրոն։ Թատրոնը նաև հյուրընկալում է մի շարք նշանավոր համույթների: Ահա վերջերս, օրինակ, Օպերային թատրոնում «Սանկտ Պետերբուրգի բալետ» թատրոնը երկրորդ տարին անընդմեջ հանդես եկավ հյուրախաղերով:

Ամփոփելով հագեցած տարին՝ թատրոնը նոր խաղաշրջանի մեկնարկը ազդարարեց Լոռու մարզից: Առաջին անգամ անցկացվեց «Արենա Լոռի» արվեստի միջազգային փառատոնը, որի բացումը ազդարարվեց Ստեփանավանում: Օգոստոսի 28-ին, 19։30-ին ներկայացվեց Արամ Խաչատրյանի «Դիմակահանդես» բալետը, իսկ օգոստոսի 29-ին, 19։30-ին կներկայացվի Արմեն Տիգրանյանի «Անուշ» օպերան: Ներկայացումները ընթանում են Սեփանավանի Սոս Սարգսյանի անվան մշակույթի պալատի բակում: Կարևորվել է մարզերում մշակութային կյանքի ակտիվացումը, որպեսզի թատրոնի աշխատանքը ներկայացվի նաև մարզերում, ծրագրերին աջակցում է նաև ԿԳՄՍ նախարարությունը:

«Մարզերում մշակութային կյանքի աշխուժացումը մեր կարևոր անելիքներից է։ Օպերային թատրոնը իր նոր թատերաշրջանի մեկնարկը կտա Ստեփանավանում, օգոստոսի 28-ին և 29-ին։ Սոս Սարգսյանի անվան մշակույթի պալատի բակում կներկայացվեն Արամ Խաչատրյանի «Դիմակահանդես» բալետը և Արմեն Տիգրանյանի «Անուշ» օպերան։ Հուսով եմ՝ մեր բազմաթիվ քաղաքացիներ կօգտվեն այս հնարավորությունից և ներկա կլինեն ներկայացումներին»,-նշում ԿԳՄՍ նախարար Ժաննա Անդրեասյանը:

Ստեփանավանի համայնքապետարանի աշխատակազմի քարտուղար Հասմիկ Մովսիսյանի խոսքով՝ այս ներկայացումներով համայնքում մեկնարկում է մշակութային նոր ալիք։ Տարվող աշխատանքը Օպերայի և բալետի ազգային թատրոնի տնօրեն Կարեն Դուրգարյանի և Ստեփանավանի համայնքի ղեկավար Արմեն Գրիգորյանի և ԱԺ մի շարք պատգամավորների միջև ծավալված նախաձեռնող և արդյունավետ համագործակցության արդյունք է։

«Սպասվում է մշակութային մի իրադարձություն, որն իր բացառիկ և աննախադեպ բնույթով մեծ ոգևորություն է առաջացրել քաղաքի բնակչության շրջանում։ Օպերայի և բալետի ազգային ակադեմիական թատրոնի 93-րդ թատերաշրջանի մեկնարկը հենց Ստեփանավանից ազդարարելը մեծ պատիվ է և միաժամանակ հզոր մշակութային շունչ համայնքի համար։ Ստեփանավանը մշտապես աչքի է ընկել իր հարուստ մշակութային անցյալով և արվեստասեր հասարակությամբ։ Եվ ահա, երկար սպասումից հետո, մեր քաղաքը վերածվում է բեմի»,- նշում է Հասմիկ Մովսիսյանը:

Ալմաստ Մուրադյան