Համերգային նոր ծրագիր Գրումրու պետական դրամատիկական թատրոնում
Փետրվարի 7-ին` ժամը 17:00-ին, Հայաստանի պետական երիտասարդական նվագախումբը (գեղարվեստական ղեկավար և գլխավոր դիրիժոր Սերգեյ Սմբատյան) համերգային ծրագրով ելույթ կունենա Գյումրու Վարդան Աճեմյանի անվան պետական դրամատիկական թատրոնում:
Հանդիսատեսին կներկայացվի բազմաժանր ծրագիր` դասական ստեղծագործություններից մինչև հոլիվուդյան կինոարվեստի գլուխգործոց դարձած հանրահայտ ֆիլմերի երաժշտություն: Կհնչեն Ալեքսանդր Հարությունյանի, Դմիտրի Շոստակովիչի, Էդվարդ Միրզոյանի, Էդվարդ Գրիգի, Մոնթի Նորմանի, Ջոն Ուիլյամսի, Հանս Զիմերի, Ջեյմս Հորների, Էնիո Մորիկոնեի և Նինո Ռոտայի ստեղծագործությունները, հայտնում է նվագախմբի հասարակայնության հետ կապերի բաժինը:
Նվագախումբը հասցրել է հանդես գալ բազմաթիվ համերգներով Հայաստանում և նրա սահմաններից դուրս: Նվագախմբի ելույթները միշտ ջերմորեն են ընդունվում հանդիսատեսի կողմից, արժանանում երաժշտասեր հասարակության բարձր գնահատականին, հիացնում Գերմանիայի, Ֆրանսիայի, Ռուսաստանի, Բելգիայի, Նիդերլանդների և այլ երկրների հեղինակավոր համերգասրահների ունկնդիրներին: Նվագախումբը Սերգեյ Սմբատյանի գլխավորությամբ ելույթ է ունեցել աշխարհի հանրահայտ համերգասրահներում` Opera Garnier (Փարիզ), Konzerthaus (Բեռլին), Dr. Anton Philipszaal (Հաագա), Չայկովսկու անվան համերգասրահ և Կոնսերվատորիայի Մեծ համերգասրահ (Մոսկվա), Palais des Beaux-Arts (Բրյուսել) և այլն:
2008թ.-ին ՀՀ կառավարության որոշմամբ նվագախումբը ստանձնել է պետական կարգավիճակ՝ բարձր վարպետության և արդի երաժշտության տարածման համար:
2009թ.-ից նվագախումբը Եվրոպայի ազգային երիտասարդական նվագախմբերի ֆեդերացիայի անդամ է (EFNYO):
- Created on .
- Hits: 2593