Մեկնարկեց «Գեղարվեստական տպագրության Չորրորդ միջազգային բիենալե, Երևան 2023»-ը

Երևանի քաղաքի բարձրադիր վայրերից մեկում՝ Ազնավուր կենտրոնում, մեկնարկեց «Գեղարվեստական տպագրության Չորրորդ միջազգային բիենալե, Երևան 2023»-ը։ Մինչև նոյեմբերի 8-ը ցուցադրվելու են մի շարք հայ և օտարերկրացի արվեստագետների աշխատանքները։

Հայաստանում կերպարվեստի բնագավառում իր ծավալով և տարածաշրջանում միջազգայնորեն ճանաչված միակ Գեղարվեստական տպագրության երևանյան միջազգային բիենալեն կազմակերպվում է «Մշակույթների երկխոսություն» կազմակերպության կողմից 2017 թվականից։ Այն դարձել է կարևոր իրադարձություն մայրաքաղաքի մշակութային կյանքում, որը միևնույն ժամանակ ամրագրում է Հայաստանի դերը՝ որպես գեղարվեստական տպագրության կենտրոն տարածաշրջանում: «Գեղարվեստական տպագրության Չորրորդ միջազգային բիենալե, Երևան 2023»-ն այս տարի անցկացվում է սեպտեմբերի 8-ից նոյեմբերի 8-ը։ Գլխավոր գործընկերներն են Երևանի քաղաքապետարանը, Կրթության, գիտության, մշակույթի և սպորտի նախարարությունը։ Վերջնական մրցույթում ցուցադրելու համար ներկայացված 55 երկրի 413 արվեստագետի 1500 աշխատանքից ընտրվել է 53 երկրի 231 փորագրանկարչի 355 գեղարվեստական տպագրության բազմատեսակ տեխնիկաներով ու ոճերով կատարված փորագրանկար։

«Մշակույթների երկխոսություն» հիմնադրամի նախագահ Սոնա Հարությունյանի խոսքով՝ փառատոնն իրականացվում է արդեն չորրորդ անգամ՝ «Մշակույթների երկխոսություն» կազմակերպության նախաձեռնությամբ,  ՀՀ ԿԳՄՍ նախարարության և Երևանի քաղաքապետարանի հովանավորությամբ:

Այս տարի փառատոնի նախնական փուլին ներկայացվել են 1500 աշխատանքներ։
Ներկայացված մեծաթիվ աշխատանքները վկայում են փառատոնի միջազգային կայացման, ճանաչման և միջազգային հանրության կողմից այն կարևորելու մասին։

«Մասնակից արվեստագետների քանակով առաջին հորիզոնականը զբաղեցնում է Լեհաստանը՝ 46, որին հաջորդում են Հայաստանը՝ 39, Ռուսաստանը՝ 16, Ֆրանսիան ՝ 8 և Ճապոնիան՝ 7 փորագրանկարչով»,- ասում է Սոնա Հարությունյանը։
Մինչ բիենալեի մեկնարկը հրավիրված մամուլի ասուլիսին միացել էին նաև մի շարք դեսպանատների ներկայացուցիչներ։ Ժյուրիի կազմում ևս ընդգրկվել են միջազգային փորձագետներ, արվեստագետներ։

ՀՀ-ում Շվեյցարիայի Համադաշնության արտակարգ և լիազոր դեսպան Լուկաս Ռոզենքրանցը մեծ ուրախությամբ խոսեց համագործակցության մասին՝ նշելով, որ միջազգային բիենալեի ժյուրիի կազմում  ընդգրկվել է նաև շվեյցարացի պրոֆեսոր Ալեքսանդրա Շտեհելինը:

«Մեծ հետաքրքրությամբ կհետևենք և կսպասենք տեսնելու ներկայացված բոլոր  աշխատանքները: Մենք տեղյակ ենք, որ այս բիենալեն ունի ոչ միայն տարածաշրջանային, այլ նաև միջազգային նշանակություն: Սա, անշուշտ, լավ հնարավորություն է հայ արվեստագետների համար միջազգային ոլորտում իրենց ստեղծագործությունները ճանաչելի դարձնելու տեսանկյունից»,- հավելեց դեսպանը: Իսկ Գերմանիայի դեսպանության և «Մշակույթների երկխոսություն» կազմակերպության հետ համագործակցությունը սկսվել է 2012 թվականից։ Արդյունքում իրագործվել են մի շարք մշակութային ցուցադրություններ, բիենալեներ:
ՀՀ-ում Գերմանիայի Դաշնային Հանրապետության փոխդեսպան Էրիկ Թինտրուպին նշեց, որ այս տարի բիենալեի ընթացքում Հայաստանում հյուրընկալելու են գերմանացի պրոֆեսոր Ֆրանկ-Յոախիմ Գրոսմանին։ Նա կազմակերպելու և մասնակցելու է  տարբեր աշխատարաններին և բիենալեի շրջանակում կազմակերպվող միջազգային մեծ համաժողովին:

Բիենալեի շրջանակում կարևոր տեղ է զբաղեցնում նաև «Հայաստանը` տարածաշրջանում Գեղարվեստական տպագրության կենտրոն» միջազգային համաժողովը։ Համաժողովն անցկացվելու է սեպտեմբերի 12-17 -ը։ Մասնակիցները փորագրանկարիչներ ու փորձագետներ են։ Նրանց թվում է, օրինակ, Ավստրիան ներկայացնող Մանֆրեդ Էգերը։ Փորագրանկարիչը ներկայանում է «Ժամանակակից փայտափորագրությունն Ավստրիայում» աշխատանքով։ Այս խորագրի նպատակն է համախմբել փորագրանկարիչներին ամբողջ աշխարհից և կիրառել գեղարվեստական բարձր տպագրության տեխնիկաները, խթանել այդ ճյուղի զարգացումը: Բիենալեն նաև հնարավորություն է ընձեռում անդրադառնալ գեղարվեստական տպագրության և գրաֆիկ դիզայնի միջև հարաբերություններին։ Հենց այդպիսի փոխկապակցվածության մասին է բրազիլացի ինքնուս տպագրիչ Տիագո Մոդեստոյի մտահաղացումը։ Այն ներառում է բրազիլական ավանդական մշակույթը, ստեղծագործողի մտորումներն ու իղձերը, որոնք յուրահատուկ սիմվոլներ են դարձել։

Բիենալեի միջազգային ժյուրիի նախագահն է «Կրակովի Գեղարվեստական տպագրության IX միջազգային տրիենալե»-ի խորհրդի անդամ պրոֆեսոր Մաթեուշ Օտրեբան Լեհաստանից։

Ալմաստ Մուրադյան

Ստորև ներկայացնում ենք ցուցադրվող աշխատանքներից մի քանիսը։