Վլադիմիր Բուրիչ. Հրաշքով փրկվածները


***
անցնում են տարիները
և երիտասարդանում են
դեմքերը լուսանկարներում

***
կյանքը
ազատ ժամանակն է մահից


***
բահը
շանթարգելն է իմ հուսահատության

միայն հողը գիտի
ճիգը նրա
և ուժը


***
գրքերը չեն փոխարինի հորն ու մորը
գրքերին չեն փոխարինի կինն ու որդին

ես մտա
սոսնձաբույր
փակուղի


***
ավտոբուսը չի մոտենում մարդկանց
ավտոբուսը մոտենում է կանգառին


***
մեջքիս պառկած
նայում եմ առաստաղին
ականջներս լի արցունքներով


***
գնում եմ ջրի
և դույլիս հատակում
գլուխ են ջարդում երիցուկները


***
աշխարհը լցնում են
հետպատերազմյան մարդիկ
հետպատերազմյան իրերը

նամակների արանքում գտա
մինչպատերազմյան օճառի կտոր
չգիտեի ինչ անել
լվացվել
արտասվել

մինչպատերազմյան դարաշրջանը
խորտակված Ատլանտիդա է

և մենք
հրաշքով փրկվածներ


***
ատելությունը կործանարար է
սերը պահանջում է ձևեր

ինչ դժվար է արարելը
ավերակ մոլորակի
սեղանին


***
մարդկությունը
անխորտակելի նավ է

հինգ միլիարդ
մենախուց


***
կարոտի թեորեմ

արմունկի անկյունում
պատկերված է գլխի շրջագիծը

պետք չէ
ոչինչ
ապացուցել


***
քո գլուխը բարձին
ձյան վրա սառած թռչուն է

Ռուսերենից թարգմանեց Արմեն Սարգսյանը

  • Hits: 1019