ՀՀ մշակույթի նախարարության «Մշակութային կանգառ» ծրագրով  Գյումրու Վարդան Աճեմյանի անվան պետական դրամատիկական թատրոնի բեմում Թբիլիսիի Պետրոս Ադամյանի անվան պետական հայկական դրամատիկական թատրոնի  դերասաններն էին նոր բեմադրությունով:
    Սանդլաժի «Օրը՝ անձրևոտ» ներկայացումը  կորած մարդկանց մասին է, որոնք իրենց մենակությունը, հիվանդությունը, անգործությունը փորձում են խեղդել խմիչքով։ Ալկոհոլը փչացնում և ոչնչացնում է մարդկանց, նրանք կորցնում են ամեն ինչ ու հայտնվում սթափարանում, որտեղ ամեն մեկը  փորձում է գտնել կամ  վերջնականապես զրկվել այն  փրկօղակից, որ կյանքը տալիս է նրանց:
    «Սթափարանի մարդիկ  տարբեր են իրենց ճակատագրով, պատմությամբ ու մասնագիտությամբ, միայն նույն  է գործած սխալը՝  խմիչքի ընտրությունը: Նրանք գտնվում  են միևնույն օղակի մեջ: Սա այսօրվա կյանքն է, այս օրն  է, որտեղ խոսվում է,  որ անկախ ամեն ինչից պետք չէ բաժակի մեջ փնտրել փրկություն: Խոսվում է Տիրոջ, աշխարհի, յուրաքանչյուրի ցավի մասին, և թե ինչպես դուրս գալ այդ իրավիճակից:  Ներկայացումը իրական կյանքի դաս է: Չպիտի վախենալ կյանքից և պետք է ապրել, ապրել դժվարությամբ, բայց չդառնալ հարբեցող»,- մեկնաբանեց  Թբիլիսիի Պետրոս Ադամյանի անվան պետական հայկական դրամատիկական թատրոնի  դերասան  Դավիթ Բարսեղյանը:
    1296Բարդ հոգեբանական դրաման  նաև առաձնանաում էր ռեժիսորական  բարդ լուծումներով, որը  ստիպում էր հանդիսատեսին լարված հետևել ու հասկանալ ամեն մի բառի ու  շարժման  նշանակությունը:
    Պետրոս Ադամյանի անվան դրամատիկական թատրոնը միակ հայկական պետական թատրոնն է, որը գործում է Հայաստանի սահմաններից դուրս՝ Թբիլիսիում: 1824 թվականից սկսած Ներսիսյան դպրոցում հայերեն լեզվով ներկայացումներ էին բեմադրվում, իսկ հետագայում նաև՝ քաղաքի այլ բեմերում: Արդեն իսկ 1856 թվականին կազմավորվեց հայկական թատրոն` արհեստավարժ թատերախմբով, որը ղեկավարում էր Գևորգ Չմշկյանը: 
   Վերջին տարիներին թատրոնի շենքը  վթարային վիճակում էր, Վրաստանի կառավարությունը գումար է տրամադրել վերանորոգելու համար: Չունենալով սեփական տանիք՝ այս տարիներ ընթացքում թատրոնը ավելի քան հարյուր ներկայացմամբ հանդես է եկել ինչպես Թբիլիսիի տարբեր թատրոններում, այնպես էլ Վրաստանի տարբեր շրջաններում ուՀայաստանում: Ունեցել են մոտ 20 պրեմիերա:
    «Միակ խնդիրն այն է, որ մենք մեր տանը չենք խաղում: Թատրոնը գործում է, բայց մեր ցանկությունն է տուն վերադառնալ: Եթե ստեղծագործական անձնակազմը տանը չէ, ինչ-որ մի բան կորչում է: երկու օր է՝ սկսվել են վերանորոգման աշխատանքները, և հարկավոր է  ևս երկու տարի, որ  վերջապես  կարողանանք մեր թատրոնի պատերի ներսում  ներկայանալ հանդիսատեսին»,- ասաց Թբիլիսիի հայկական պետական թատրոնի գեղարվեստական ղեկավար Արմեն Բայանդուրյանը:
    «Օրը՝ անձրևոտը» բեմադրության հաջորդ կանգառները Ստեփանավանում, Իջևանում և Վանաձորում են: Իսկ ավելի ուշ բեմադրությունը ներկայանալու է միջազգային թատերական փառատոներին:

                                                                                                         Անահիտ Հարությունյան