ՄԵԿՆԱՐԿԵԼ Է ԲՐԻՏԱՆԱԿԱՆ ՖԻԼՄԵՐԻ 15-ՐԴ ՓԱՌԱՏՈՆԸ
Եվրոպական կինոյի դասականներից ռեժիսոր Քեն Լոուչի «Ես`Դենիել Բլեյք» ֆիլմով այսօր «Մոսկվա» կինոթատրոնում մեկնարկեց Բրիտանական ֆիլմերի հոբելյանական 15-րդ փառատոնը։
Ատաղձագործ Բլեյքն ապրում է Նյուքասլում։ Սրտի կաթվածից հետո հիմնական աշխատանք չունի։ 59-ամյա Դենիելը պետության աջակցության հույսին է մնացել, բայց սոցիալական ապահովության համակարգի ներկայացուցիչները ամիսներ շարունակ բյուրոկրատական քաշքշուկի մեջ են պահում նրան։
Իր կյանքի այս դժվարին օրերին, սակայն, նա կարողանում է ձեռք մեկնել կարիքի մեջ գտնվող Քեթիի ընտանիքին։ Քեթին ու նրա երկու երեխաները՝ Դեյզին ու Դիլանը դառնում են Դենիելի ընտանիքի անդամ՝ փորձելով միասին հաղթահարել սոցիալականից մինչև հոգեբանական խնդիրներ։
«Ես`Դենիել Բլեյք» ֆիլմը մեծ էկրան է բարձրացրել 2016 թվականին, սակայն այս կարճ ժամանակահատվածում հասցրել է երկու անգամ արժանանալ Կաննի կինոփառատոնի «Ոսկե արմավենու ճյուղ» մրցանակին, ինչպես նաև դառնալ «Տպավորիչ բրիտանական ֆիլմ» անվանակարգի մրցանակակիր BAFTA մրցանակաբաշխության ժամանակ։
Փառատոնի բացմանն ու ֆիլմի ցուցադրությանը ներկա էր նաև ՀՀ-ում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջուդիթ Մարգարեթ Ֆարնուորթը։
«Բրիտանական ֆիլմերի փառատոնն իր հաստատուն տեղն է զբաղեցրել Հայաստանի մշակութային օրացույցում։ Այս տարի լրանում է նաև Հայաստանի և Միացյալ Թագավորության հարաբերությունների հաստատման 25-ամյակը։ Այս տարիներին հենց մշակույթն է օգնել, որ հայերն ու բրիտանացիներն իրար ավելի լավ ճանաչեն ու հասկանան։
Կարևորում եմ այն հանգամանքը, որ այս տարվա ֆիլմերը բարձրաձայնելու են մարդու իրավունքների, բազմազանության և ներառականության թեմաները։ Ֆիլմը ժամանց է, բայց կարող է և պետք է նաև մտածելու, աշխարհին այլ հայացքով նայելու, մեր ենթադրությունները հարցականի տակ դնելու հնարավորություն տա»,- ասաց նա։
Փետրվարի 18-24-ը Բրիտանական ֆիլմերի փառատոնի շրջանակներում կինոսերներին կներկայացվի յոթ ֆիլմ։ Յուրաքանչյուր ֆիլմ կցուցադրվի միայն մեկ օր, բայց չորս անգամ։ Ֆիլմերը կարելի է դիտել 17:00-ին, 19:00-ին «Մոսկվա» կինոթատրոնի Կարմիր դահլիճում (անգլերեն) և 18:00-ին, 20:00-ին Կապույտ դահլիճում (թարգմանված): Ցուցադրությունների մուտքն ազատ է։
Փառատոնային ֆիլմերը դիտելու հնարավորություն կունենան նաև Դիլիջանի, Գյումրու, Մարտունու և Արմավիրի կինոսերները։ Եվ Երևանում (Հայ-ռուսական համալսարան և Fiction ակումբ), և մարզային այցելությունների ընթացքում բացի հիմնական ծրագրից կցուցադրվեն նաև մարդու իրավունքների թեմայով կարճամետրաժ ֆիլմեր, որոնք ընդգրկված են փառատոնի հատուկ ծրագրում։ Կինոդիտումներից հետո կկազմակերպվեն թեմատիկ քննարկումներ։
Հայ-Ռուսական համալսարանում և «Թումո» ստեղծարար տեխնոլոգիաների կենտրոնում կանցկացվեն վարպետության դասեր փառատոնի հյուրեր Սառա Մոսսեսի (Together Films ընկերության տնօրեն) և Քերոլայն Պիրեսի (Nerdero ընկերության տնօրեն) գլխավորությամբ։ Դասերի ավարտին ուսանողները կնկարահանեն ֆիլմեր, լավագույնները կարժանանան մրցանակների։
Այս տարի փառատոնի ուշադրության կենտրոնում է նաև ներառականության թեման։ Կազմակերպիչները հայտարարել են «Ներառականությունն իմ համայնքում» լուսանկարների մրցույթ։
Բրիտանական ֆիլմերի հոբելյանական 15-րդ փառատոնն իրականացվում է Բրիտանական խորհրդի կողմից՝ Երևանում Բրիտանական դեսպանատան և Beeline-ի աջակցությամբ։
Աննա Կարապետյան
- Created on .
- Hits: 2762