Шаблоны для Joomla 3 здесь

«ԱՅԲ»․ ՑՈՒՑԱՀԱՆԴեՍ` ՆՎԻՐՎԱԾ ՀԱՅՈՑ ԱՅԲՈՒԲԵՆԻՆ

Ստեղծվել է՝ Հինգշաբթի, 30 Մարտ 2017 Հեղինակ՝ cultural
 Գյումրու «Գալերի 25» պատկերասրահում բացվել է Հրայր Հակոբյանի «ԱՅԲ» ցուցահանդեսը, որտեղ ներկայացված է հայոց  այբուբենը տարբեր  ոճերի ու զարդանախշային նկարազարդումներով:

«ԱՅԲ. մեկ տառի  անվանում, որի հիմքում ընկած է ամբողջ   հայկական այբուբենի  ձևավորման սկզբունքը»,- այսպես է կարծում գյումրեցի  Հրայր Հակոբյանը, ով արդեն 3 տարի է՝ փորձում է բացահայտել  հայոց այբուբենի  գաղտնիքն ու հասկանալ Մեսրոպ Մաշտոցին, ով արարել է՝ առաջնորդվելով հատուկ  համակարգով:

Այս ամենն սկսվել է այն ժամանակ, երբ Պոլիտեխնիկական համալսարանում սովորելու տարիներին  հանձնարարել են ուսումնասիրել Թորոս Ռոսլինի մանրանկարները: Ուսումնական առաջադրանքը  դարձել է վճռորոշ:  Հրայր Հակոբյանը սկսել է  պրպտել ու ուսումնասիրել ոչ միայն ռոսլինյան  նկարազարդումները, այլև մյուս մանրանկարիչների գործերը:

«Սկսեցի 4 ավետարանիչների  նկարները վերարտադրել և տեսա, որ ոչ բոլոր տառերը կան, փորձեցի նմանությամբ վերականգնել մանրանկարներում բացակա տառերը:  Առաջին աշխատանքս մի կերպ կարողացա ստանալ, մեծ դժվարությամբ: Հարկավոր էր լուրջ ուսումնասիրություն կատարել, ու հասկացա, որ ամեն մի տառ ունի իր առանձնահատկությունը, ոչ մի մասնիկ հենց այնպես արված չէ: ԱՅԲ. այս երեք տառերից կարելի է ստանալ ողջ այբուբենը: Օրինակ՝ Ճ, Հ, Ջ, Զ տառերը կարծես ընդհանուր սիմետրիայից դուրս մնան»,- ասում է Հրայր Հակոբյանն ու փաստում, որ այս հարցում իրեն շատ օգնել է դիզայներական կրթությունը: Մաթեմատիկայի լեզվով ու տրամաբանությամբ էլ պարզել է, որ  հայոց այբուբենը իր հնչյունային հերթականությամբ նման է հունականին:

 Այբուբենը բացահայտելու հետ միաժամանակ շարունակում է վերծանել հայ մանրանկարիչների աշխատանքները: Ոճային նմանություններն ու առանձնահատկությունները հաշվի առնելով՝ երեք տարի առաջ էլ սկսել է նկարել, թեև ընդամենը երկու ամսվա նկարչական կրթություն ուներ: Մեկը մյուսին հաջորդեցին տարբեր  զարդանախշերով այբուբեններ: Այժմ արդեն սրբապատկերներ է նկարում: Հոգևորականների խորհուրդներն ի գիտություն ընդունելով՝ որոշ աշխատանքներ տրամադրում է Էջմիածնի Մայր տաճարին կից  գործող խանութ-սրահին:

Ցուցահանդեսին ներկա էր նաև Հրայր Հակոբյանի դասախոս Ալեքսան Արզումանյանը։

 «Թորոս Ռոսլինին իշխաններից մեկն ասում է, թե  քո ամեն մի նկարի  համար մի ձի կտամ, միայն թե նկարածներդ ինձ տուր: Մանրանկարիչն էլ պատասխանում է, որ 20 տարի հետո այդ ձիերի վրնջոցն էլ չի լսվի, իսկ իր նկարների գույներն անգամ չեն փոխվի:

Ուզում եմ, որ Հրայրը հասնի այնպիսի վարպետության, որ  ոչ մի գույն ու ոչ մի շեղում չլինի, ինչքան էլ  ժամանակ անցնի: Սկսած գործը պետք է հասցնել կատարելության»,- ասաց Արզումանյանը։

Նշենք, որ «Գալերի 25»-ում մեր այբուբենը կդիտարկվի երաժշտական, պատմական  ու գիտական տեսանկյուններից։

Անահիտ Հարությունյան
Դիտումներ: 1266